1. Skilgreining

Kreditkort er greiðslukort sem gerir þér kleift að kaupa núna og borga seinna. Bankinn sem gefur út kortið er því að veita þér lán til skamms tíma fyrir kaupum yfir mánuðinn og það vaxtalaust – a.m.k. ef þú greiðir kreditkortareikninginn á réttum tíma og í heilu lagi! Þegar þú notar kreditkort dregst ekki beint af bankareikningnum þínum eins og í tilfelli debetkorta heldur greiðist öll neysla mánaðarins í einni greiðslu í lok mánaðar.

Kreditkortum getur einnig fylgt ýmis fríðindi eins og flugpunktar og ferðatryggingar, en það fer þó allt eftir verðflokk. Fyrir kreditkort greiðir þú í flestum tilfellum árgjald og því hærra sem árgjaldið er, því betri eru fríðindin (oftast). Þessar upplýsingar getið þið kynnt ykkur nánar á vefsíðum kortaútgefenda á Íslandi.

Kreditkort er öflugt tól þegar það er notað rétt. Þ.e. að þú getur nýtt tímann, frá því þú færð vöru í hendurnar þar til þú greiðir fyrir hana, til að ávaxta peninginn t.d. inn á vaxtareikning. Hins vegar er líka hætta á því að missa yfirsýn ef ekki er fylgst vel með útgjöldum. Það getur leitt til þess að þú þurfir að dreifa reikningnum og þ.a.l. að borga vexti af nýrri skuld.

2. Raundæmi

Jón fer í raftækjaverslun í byrjun mánaðar og kaupir sjónvarp á 180.000 kr. með kreditkortinu sínu. Hann borgar fyrir sjónvarpið í verslun, en leggur ekki út fyrir því fyrr en í lok mánaðar þegar kemur að því að greiða kreditkortareikniginn. Ef hann borgar reikninginn fyrir eindaga, greiðir hann aðeins 180.000 kr. Ef hann bíður eða borgar aðeins hluta, bætast vextir og kostnaður við.

3. Hvaða áhrif hefur þetta á mig?

Kreditkort veita þér ákveðinn sveigjanleika. Þú getur nýtt það sem vaxtalaust skammtímalán, auk fríðinda eins og trygginga og vildarpunkta. Þessum sveigjanleika þarf þó að fylgja ábyrgð. Ef þú gleymir þér og eyðir umfram það sem þú þénar, safnast skuldin upp með vöxtum og kostnaði. Þess vegna er mikilvægt að fylgjast náið með útgjöldum og greiða alltaf á réttum tíma. Kreditkort er nytsamlegt tól, en getur orðið dýrt ef þú missir stjórn á neyslunni þinni!

4. Tegundir

Til eru óteljandi tegundir kreditkorta með mismunandi fríðindum, sem nálgast má á vefsíðum kortaútgefenda á Íslandi. Þó má skipta kreditkortum í tvo yfirflokka: Almennt kreditkort sem er hið hefðbundna kreditkort sem lýst er hér að ofan og svo fyrirframgreitt kreditkort sem er í eðli sínu (nánast) það sama og debetkort.