1. Skilgreining
Sjóður er safn fjármuna sem einstaklingar og/eða lögaðilar leggja fé í, sem síðan er sameiginlega fjárfest af sérfræðingum eða samkvæmt fyrirfram skilgreindri stefnu. Hver þátttakandi á hlut í sjóðnum í hlutfalli við framlag sitt og nýtur þess sem eignirnar í sjóðnum skila af sér, hvort sem það er hækkun, lækkun eða arður.
Fjárfestingarsjóðir veita fjárfestum aðgang að dreifðum eignasöfnum, oft með lægri áhættu og minni kostnaði en ef hver og einn fjárfesti sjálfur í öllum undirliggjandi eignum. Þeir eru sérstaklega algengir fyrir þá sem vilja fjárfesta reglulega án þess að velja einstakar eignir sjálfir.
Nánar:
Sjóðir geta fjárfest í margs konar eignum: hlutabréfum, skuldabréfum, fasteignum eða jafnvel öðrum sjóðum. Í mörgum tilvikum sér rekstrarfélag um að stýra sjóðnum og tryggja að fjárfest sé samkvæmt stefnu og reglum. Hver fjárfestir getur keypt og selt hluti í sjóðnum á ákveðnum tímum eða á hverjum degi, eftir tegund sjóðsins.
2. Raundæmi
Guðrún ákveður að fjárfesta 20.000 kr. á mánuði í sjóði sem fjárfestir bæði í hlutabréfum og skuldabréfum. Hún kaupir eignarhlut í sjóðnum og eignarhlutur hennar hækkar eða lækkar eftir því hvernig gengur hjá eignunum sem sjóðurinn fjárfestir í. Með tímanum byggir hún upp dreift eignasafn, án þess að þurfa að velja einstakar fjárfestingar sjálf.
3. Hvaða áhrif hefur þetta á mig?
Sjóðir bjóða upp á einfaldan og sveigjanlegan hátt til að fjárfesta. Þeir henta bæði byrjendum og reyndum fjárfestum sem vilja dreifa áhættu og nýta sér faglega stýringu. Með því að leggja reglulega í sjóð geturðu byggt upp eignasafn til framtíðar. Það er þó mikilvægt að skoða vel kostnað, áhættustig og fjárfestingarstefnu áður en valinn er sjóður.
Athugaðu:
Þó sjóður sé dreifð fjárfesting, þá getur virði hans lækkað líkt og önnur fjárfesting. Sumar tegundir sjóða (t.d. hlutabréfasjóðir) geta verið áhættumeiri en aðrar (t.d. skuldabréfasjóðir). Athugaðu einnig gjöld fyrir aðgang, stýringu og viðskipti.
4. Tegundir
Hlutabréfasjóðir: Fjárfesta aðallega í hlutabréfum, hærri áhætta en möguleg ávöxtun meiri
Skuldabréfasjóðir: Fjárfesta í skuldabréfum, yfirleitt með lægri áhættu og þ.a.l. vænt ávöxtun lægri.
Blandaðir sjóðir: Fjárfesta bæði í hlutabréfum og skuldabréfum.
Sérhæfðir sjóðir: T.d. fasteignasjóðir eða alþjóðasjóðir sem fjárfesta utanlands
Framtakssjóðir: Kaupa beinan eignarhlut í óskráðum fyrirtækjum með það að markmiði að bæta rekstur og efla vöxt áður en hluturinn er seldur með hagnaði síðar meir
